Timete Deum

July 5

Simba

July 6

Lunis

ONONAN BABASAEN Taon II

Os. 2: 14, 15-17, 19-20

Babasaen ya inaon ed libro na propita Oseas

Iyakar ko lamet ed kalawakan yan bii;

diman ko pandaleman na panangarok

pian napapawil kod siak.

Ipawil kod sikato may kaubasan

a kayaryan to nen saman,

tan pagmaliwen kon puirta na ilalo

so Patar na Gunigon.

Ebatan to ak diman a singa samay

ginawa to nen malangwer ni,

sanen sikatoy pinmaway a nanlapud Egipto.

Diad satan tawagen to ak lamet ya asawa to–

ag to ak la tawagen a Baal to.Ag ko lan balut pabitlad sikato

so ngaran a Baal.

Israel, pagmaliwen ta ka ya asawak;

siak so matwa tan matoor ed sika;

ipanengneng kod sikay ag mangoman

a panangarok tan panangasik

tan pagmaliwen ta kan kayaryan ko

ya anggad angga.

Tooren koy sipan ko tan kayaryanen ta ka,

tan birbiren mo ak a KATAWAN.

Say Salita’y Katawan.

Ebat a Salmo E/. (8) Maaro tan mapangasi so KATAWAN.

Agew-agew a misalamat ak ed sika;

anggad-angga ya idayew ta ka.

Matalonggaring so KATAWAN tan manepenepeg a galangen;

sigput ya ag natalusan so inkatalonggaring to.

E/.

Manlapud sakey a kailalakan ya anggad ontombuk, nadayew iray ginagawam;

ibawag da ray makapanyarin kimey mo.

Salitaen da so kagalangan tan say katageyan mo,

tan dalepdepen ko ray makapakelaw a gawgawam.

E/.

Salitaen na katoowan iray makapanyarin gawgawam,

tan ibawag koy inkatalonggaring mo.

Ibaga ray nipaakar ed ag nasabsabaan a kamaungan mo

tan ikanta ray nipaakar ed panangasim.

E/.

Say KATAWAN maaro tan mapangasi,

aliwan maipapasnuk tan baleg so ag mangoman a panangaro to.

Sikatoy maung ed amin a too

tan mapangasi ed amin a pinalsa to.

E/.

Sal. 145: 2-3/4-5/6-7/8-9

Alleluia Taon I tan II

1 Sam. 3:9; Jn. 6:69E/. Alleluia. Mansalita ka, O KATAWAN: onderengel so aripen mo! Walad sika ray salitan

mangiiter na bilay ya andi-anggaan. E/. Alleluia. (Or any in no. 509.)

IBANGHILYO Mat. 9: 18-26

+Babasaen na masanton ibanghilyo onung ed Mateo

Nen peles nen Jesus ya ibabaga ra ya, sinmabiy sakey a Judion opisyal. Tinmalimukor ya

angigalang ed arap nen Jesus tan inkuanto, “Kapatepatey na anak kon bii. Balet mila kad

siak, itapew moy limam ed sikato, pian nabilay.”

Akila sirin si Jesus a kaiba to ray disipulo to.

Tinmombuk ed sikatoy sakey a biin labinduay taon lan maniirap lapud alablabas a

pandadala to. Sinmingger tan diniwit toy saloy na kawes nen Jesus. Ta inkuantod sikaton

dili, “No nadiwit ko labat so kawes to, onabig ak la.”

Linmingaw si Jesus, anengneng to may bii tan inkuanto, “Paksil moy linawam, anak ko!

Say pananisiam so amaabig ed sika.” Inmabig may bii diad saman a bekta.

Nen sinmabiy Jesus ed abung to may opisyal, anengneng to ray musikon managtogtog ed

pompon tan saray totoon kingalangal. Inkuantod sikara, “Paway kayon amin! Ag inatey so

ogaw; nanaogip labat.”

Balet inelek-elekan da labat si Jesus. Nen akapaway la ray totoo, linmoob si Jesus ed

kuarto, binembenan toy limay ogaw, et binmangon la. Kinmayat yan agawa ed saman a

pasen.

Say ibanghilyo’y Katawan.

July 15

martis

ONONAN BABASAEN Taon II

Os. 8: 4-7, 11-13

Babasaen ya inaon ed libro na propita Oseas

Say Katawan kuanto: “Amili ra na saray arari iray totook, balet ag da ak impibali ed

impamili ra. Nantuturo ra na saray pangulo, balet anggapoy abubon ko. Ginagawa ran

talintao iray pilak tan saray balituk da—balet kaderalan da ya lamlamang. Kabosul koy

bakan balituk ya igagalang na saray taga siudad na Samaria. Mapalaloy petang na olok ed

sikara. Anggad kapigay itonda ran mangigalang ed talintaoy diriyos? Sakey a platiron taga

Israel so nanggawa na talintao, et aliwa ni lamlamang a dios imay ginawa to! Namisimisi

imay bakan balituk a gagalangen ed Samaria! No mangisibwag ira na dagem manani ra na

bagyo! Say alog ya ag ontakken iray bungay tanaman to et ag balut makaiter na

pantagano. Balet anggan bilang makapangiter, pambilay na saray taga arum a bansa.

“No kaonungay idadakel na ipapaalagey dan pakaekalay kasalanan, ontan met so

idadakel na saray pasen a pakapankasalananan da. Mansusulat ak na ontan lan karakel a

bangabangat ed saray totoo, balet ipapasen da ra lamlamang ya andi-kana. Mangibabagat

irad siak tan kakanen da ray karnin imbagat. Balet siak a KATAWAN et ag ak makaliliket ed

sikara, tan natan nanunotan koy kasalanan da, et dusaen ko rad saya; papawilen ko ra ed

Egipto!

Say Salita’y Katawan.

Ebat a Salmo E/. (9) Manmamatalek ed KATAWAN iray totood Israel.

Walad tawen so Dios mi,

tan gagawaen toy antokaman a labay to.

Saray diriyos da et balituk tan pilak,

ginawa ra na limay totoo.

E/.

Sal. 115: 3-4/5-6/7-8/9-10

Walay sangi ra, balet ag ira makasalita;

walay mata ra, balet ag ira makanengneng.Walay layag da, balet ag ira makadngel;

walay eleng da, balet ag ira makaangub.

E/.

Walay lima ra, balet ag ira makabemben;

walay sali ra, balet ag ira makaakar;

ag da anggan napaungol so kolukolung da.

Saray nanggagawad sikara tan amin da ray

manmamatalek ed sikara

et magmaliw ira komun a singa saray talintao

a ginagawa ra.

E/.

Manmatalek kayod KATAWAN, sikayon totood Israel.

Tutulongan tan iyaagel to kayo.

Manmatalek kayod KATAWAN, sikayon papariy Dios.

Tutulongan tan iyaagel to kayo.

E/.

Taon I tan II

Alleluia. Sal. 19: 8

E/. Alelluia. Saray salitam, O KATAWAN, et pagayagaen day puso: say bangat mo et

liwawaan toy pakatalos ko. E/. Allelluia. (Or any in no. 509.)

IBANGHILYO Mat. 9: 32-38

+Babasaen na masanton ibanghilyo onung ed Mateo

Nen oonla la ra, wala ray angyakar ed kinen Jesus na sakey a lakin emel lapud inaponay

dimonyo. Kapangekal nen Jesus ed dimonyo, ginapoan to may laki so nansalita. Mankelaw

iran amin. Inkuanda, “Ag kami ni akanengneng na onya lan pakayari ed Israel!”

Balet inkuanda ray Pariseo, “Say pangulo da ray dimonyo so mangiiter ed sikato na

pakayarin mamaekal ed saray dimonyo.”

Nililiber nen Jesus ya amin iray bario tan baley. Nambabangat ed loob na saray sinagoga

tan nampupulong na Maung a Balitan nipaakar ed Panarian. Pinapaabig to met ya amin

iray totoon maniirap na nandoroman sakit tan liliknaen. Nen anengneng to ray dakerakel a

totoo, akasian to ra lapud mapagpaga tan pakaskasi ra, a singa ra karniron anggapoy

pastol. Kanyan inkuantod saray disipulo to, “Dakel so aaniyen, balet dagdaiset so manani.

Pikasi yod Katawan na aaniyen a mangibaki na totoon manani.”

Say ibanghilyo’y Katawan

July 16

Mierkolis

ONONAN BABASAEN Taon II

Os. 10: 1-3, 7-8, 12

Babasaen ya inaon ed libro na propita Oseas

Nen saman saray totood Israel et singa ra sengeg na ubas a napnoy bunga. No panoy

inaligwas da, ontan met so indakel na saray altar ya impapaalagey da. No panoy indakel na

bungay dalin da, ontan met so impamarakep dad saray masanton lusek ya igagalang da.

Saray totoon managpalikdoy kapusuan da et nepeg la ran manirap lapud saray kasalanan

da. Igeba na Dios iray altar da tan deralen to ray masanton lusek da.

Ag mabayag sarayan totoo ikuanda, “Anggapoy ari mi lapud ag mi tinakotan so

KATAWAN. Balet, anto lamlamang so nitulong na ari ed sikami?

Say ari na Samaria et niagos a singa sakey labat a bislak a patawpataw ed tapew na ilog.

Naderal iray altar ed toktok na pokdul na Aven a dimay pangigagalangan na saray totoo ed

saray talintaoy diriyos. Natubuan na masabit a tanaman tan dikarika iray altar da. Saray

totoo iyeyag dad saray palandey, “Iyamut yo kami!” tan diad saray kapokdulan iyeyag da,

“Tabunan yo kami!”Say Katawan kuanto, “Mambaka kayo na balon dalin a para sikayo, mantanem kayoy

katonungan, tan manani kayo na saray bindision a bunga na panangaro yod siak. Panaon

la na ipawil yod siak a KATAWAN yo, et ondago ak a mangikalbod sikayo na saray

bindision.”

Say Salita’y Katawan.

Ebat a Salmo E/. (4) Laka yo lawas ed KATAWAN.

E/. (Odino) Alleluia.

Kantaan yoy dayew so KATAWAN;

ibelyaw yoy amin a makapakelkelaw

iran gawgawa to.

Manggayaga kayo, ta kayaryan to itayo;

manliket komun ya amin iray mangigagalang

ed KATAWAN!

E/.

Laka yod KATAWAN tan kerew kayoy tulong to;

tan igalang yo ed ando lan ando.

Nunot yo ray makapakelkelaw a milagron ginagawa to,

tan saray sintinsian iniiter to.

E/.

Sikayo ran kabyangay boleg nen Abraham

ya aripen na KATAWAN,

sikayo ran kabyangay boleg nen Jacob

a pinili na KATAWAN,

Say KATAWAN so Dios tayo,

para amin a katoowan iray ganggan to.

E/.

Sal. 105: 2-3/4-5/6-7

Taon I tan II

Allelluia Sal. 25: 4, 5

E/. Alleluia. Ibangat mo pad siak so linawam, O Dios ko, tan iwanwan mo ak pan mambilay

onung ed katwaan mo. E/. Alleluia (Or any in no. 509)

IBANGHILYO Mat. 10: 1-7+Babasaen na masanton ibanghilyo onung ed Mateo

Tinawag nen Jesus iray labinduan disipulo to, tan initdan to ray pakayarin mamaekal ed

saray maoges ya ispiritu tan mamaabig ed saray sakit tan liliknaen. Nia so kangaranan da

ray labinduan apostol: si Simon a tatawagey Pedro tan si Andres ya agi to; saray sanagin

Santiago tan Juan ya anak nen Zebedeo; si Felipe tan si Bartolome; si Tomas, tan si Mateo

a sumisingil na buis; si Santiago ya anak nen Alfeo, tan si Tadeo; si Simon a Patriota, tan si

Judas Iscariote a pinmaway a traidor.

Imbaki nen Jesus ira yan labindua tan onyay imbilin tod sikara: “Ag kayo oonla ed

lugar da ray Hintil; ontan met ya ag kayo oonlad anggan anton baley da ray Samaritano.

Laka yo ingen ed saray abalang a karnirod bansay Israel. Ipulong yod sikara, ‘Asingger lay

Panarian na tawen!”

Say ibanghilyo’y Katawan.

July 17

Huibis

ONONAN BABASAEN Os. 11: 1,3-4,8-9

Babasaen ya inaon ed libro na propita Oseas

Say KATAWAN kuanto,

“Nen ogaw ni so Israel,

inararok tan impaway kod Egiptoa sakey ya anak kon laki.

Balet siak so nambangat ya onakar so Israel.

Inaampupok ed taklay ko iray totook,

balet ag da binirbir a siak so angasikasod sikara.

Sinayakop ko rad panangaro tan panangasi.

Inalsak ira tan inampupok irad taklay ko;

Yinmuyuko ak ya amakan ed sikara.

“Panon toy isawak ed sika, Israel?

Panoy pangikaindan kod sika?

Nayarian ta ka kasin deralen

a singa ginawak ed Adma, tan Zeboim?

Ag iyabuloy na pusok a gawaen ko ya!

Lalon onlalaknab so panangarok ed sika.

Ag ta ka dusaen ed pasnuk ko;

ag ko la deralen lamet so Israel,

Ta Dios ak, aliwan too.

Siak a Masanton Dios, wala ed sika.

Ag ta ka dagoen a deralen.”

Say Salita’y Katawan.

Ebat a Salmo E/. (3) KATAWAN, ipanengneng mo pad sikami

so lupam, et nilaban kami.

Dengel mo kami pa, O Pumapastol na Israel;

Sika a manyodyorung ed tronom diad tagey

da ray kirubin,

ipanengneng mo pad sikami so pakayarim.

E/.

Lingaw mo kami pa, O Dios a Makapanyarin-amin!

Manlapud tawen osdungan mo kami pa;

Gala pa ta ilaban mo yan ubas ya intanem mo,

sayan malangwer nin ubas a pinabaleg

mon mabisbiskeg!

E/.

Sal. 80: 1, 2/14-15

Taon I tan II

Alleluia Sal. 27: 11E/. Alleluia. KATAWAN, ibangat mo ak pad labay ko, tan itonton mo a ked maptek a dalan.

E/. Alleluia. (Or any in no. 509.)

IBANGHILYO Mat. 10: 7-15

+Babasaen ya inaon ed masanton ibanghilyo onung kinen Mateo

Inkuanen Jesus ed saray disipulo to: Ipulong yod sikara, ‘Asingger lay Panarian na

tawen!’ Paabig yo ray mansasakit tan pabilay yo ray inaatey. Paabig yo met iray akating

tan paekal yo ray dimonyo. Angawat kayon anggapoy bayar, kanyan mangiter kayo met ya

anggapoy bayar. Ag kayo mangibubulsa na balituk, pilak, o gambang a kuarta. Ag kayo

met manaawit na bayung ed pambiahi yo, ni kawes, ni sandalya, ni anggan baston. Ta say

kumikimey nepeg ya itdan na pambilay to.

“No onsabi kayod sakey a baley o bario, mananap kayoy toon manepeg a pipundoan yo;

miayam kayod sikato ya anggad ag yo itaynan ed saman a lugar. Kaloob yod sakey ya

abung ikuanyo, ‘Manari komuy kareenen ed sayan abung!’ No manepeg iray totood saman

ya abung, itilak yoy impaabet yon kareenan ed sikara; balet no ag da kayo awaten, babawi

yo. No walad sikaray ag mangawat o ag ondengel ed sikayo, taynan kayod saman ya abung

o baley tan pokpok yoy dabuk ed sali yo. Tandaan yo ya! Diad Agew na Okum, anlemew ni

so dusa da ray taga Sodoma tan Gomorra nen saray taga satan a baley!”

Say ibanghilyo’y Katawan.

July 18

biyernes

ONONAN BABASAEN Os. 14: 1-9

Babasaen ya inaon ed libro na propita Oseas

vSikayo ran totood Israel, pawil kayo la ed KATAWAN a Dios yo. Imparokul tan impelag

kayo na kasalanan yo. Pawil kayod KATAWAN, tan iyapay yo yan pikakasi ed sikato:

“Pirdonam pan amin iray kasalanan mid sika, KATAWAN, tan dengel mo pay pikakasi mi;

et diad ontan idayew mi ka onung na insipan mi. vAg ka min balut nilaban na saray taga

Asiria, tan ag kami niagel na saray kabayon para bakal. Ag min balut la ibagad saray

talintao mi a sikaray dios mi. O KATAWAN, kakasian mo ray totoo ya anggapoy napiregan

da no ag sika lambengat.”

Say KATAWAN kuanto,

“Papawilen kod siak iray totook.

Aroen ko ra ed intiron pusok;

nakal lay pasnuk kod sikara.

Diad saray totood Israel, magmaliw ak

a singa oran ed amagan dalin.

Ombuskag iran singa saray rosas;

onaralem a maung so lamut da,

a singa saray kakiewan ed Libano.

Magmaliw iran singa sibwal na kiew,

tan mararakep a singa saray kiew na oliba.

Onsamyong so balingit dan

singa saray kiew a sidro ed Libano.

Mambilay iran walad silong na panangyagel ko lamet.

Ombaleg iran singa tanaman ed alog,

tan mambunga ran singa saray sengeg na kaubasan.

Magmaliw iran bantug a singa alak na Libano.

Saray totood Israel et anggapo lay pibali ra ed saray talintaoy diriyos;ebatan ko ray pikakasi ra tan talimaen ko ra.

Singa ak malamlambut a kiew

a manalimbeng ed sikara.

Siak so panlapwan na saray

bindision a para sikara.”

Talusan komun na saray makabat iray nisulat dia, tan dalepdepen dad puso ra. Maptek

iray dalan na KATAWAN, tan pankukurangan ira na saray matonung a totoo, balet

katutumbaan na saray makasalanan lapud ipopolisay da ra.

Say Salita’y Katawan.

Ebat a Salmo E/. (15) Say sangik idayew to ka.

Kasian mo ak pa, O Dios, lapud ag mangoman a panangarom;

ponasan mo pa ray kasalanan ko, lapud daakan a panangasim!

Orasan mo ak pad amin a kaogsan ko

tan linisan mo ak pad amin a kasalanan ko!

E./

Say matoor a puso so pampipilalekan mo;

panom pa na kakabatan mo so kanunotan ko.

Ekal mo pay kasalanan ko, et magmaliw ak a malinis;

orasan mo ak pa, et magmaliw ak ya ampoti-poti.

E./

O Dios, gawam pan malinis so pusok;

itdan mo ak pay balo tan matoor ya ispiritu.

Ag mo ak pa patataynanen ed arap mo;

ag mo pa eekalen ed siak so masanton ispiritum.

E./

Ipawil mo pad siak so gayagay panangilaban mo,

tan gawam pan mabolus so linawak ya ontoluk ed sika.

Tulongan mo ak pa a mansalita, O KATAWAN,

et idayew ta ka.

E./

Sal. 51:1-2/6-7/10-11/12, 15

Taon I tan II

Alleluia Sal. 95: 8E/. Alleluia. No diad sayan agew narengel yoy bosis to, ag yo papaawetey puso yo. E/.

Alleluia. (Or any in no. 509.)

IBANGHILYO Mat. 10: 16-23

+Babasaen na masanton ibanghilyo onung ed Mateo

Inkuanen Jesus ed saray disipulo to: “Dengel kayo! Ibabaki ta kayon singa karniro ed

pegley da ray asod katakelan. Nakaukolan a maalwar kayo a singa saray oleg tan

mauyamo kayo a singa saray malapati. vManalwar kayo, ta wala ray totoon mangerel tan

mangidalem ed sikayod korti. Siplatan da kayod saray sinagoga ra. vLapud itombuk yod

siak, salaysayen da kayod arap na saray arari tan arum ni ran manoley, pian

napaneknekan yod sikara ran saray Hintil so Maung a Balita. No iyakar da kayod korti, ag

kayo mapaga no antoy ibaga yo, o no panoy pangibaga yo. Diad satan ya oras, onsabid

kanunotan yoy ibaga yo. vTa aliwan sikayoy mansalita; say Ispiritu na Ama yo so

mansalitad panamegley yo.

V”Papatey na saray totoo iray agagi ran dili. Papatey na saray kaamaan iray anak da;

ontan met a labanan tan papatey na saray anak iray atateng da. Lapud itotombuk yod

siak, bosulen kayoy amin a totoo. Balet nilaban so toon mansiansian anggad kasamputan.

vNo pairapen da kayod sakey a baley, batik kayod sananey. Kuankod sikayo: kasakbayan a

naakar yoy amin a baley na Israel, onsabi lay Anak na Too.

Say ibanghilyo’y Katawan

July 19

sabado