Timete Deum

June 21

Simba

June 22

Lunis

ONONAN BABASAEN          2 Ar. 17:5-8,13-15,18

Babasaen ya inaon ed kumadwan libro na Saray Ari

Dinogpaan nen Salmaneser so Israel tan nilakob toy Samaria. Diad kumatlon taon na impanlakob to, a sikatoy kumasyam a taon na panooley nen Oseas, adakep na impirador na Asiria so Samaria; inawit tod Asiria iray Israelitan adakep to, insan impanayam to ray arum ed siudad na Hala, saray arum diad asingger ed Ilog na Habor diad distrito na Gozan, tan saray arum diad saray siudad na Media. 

Ataloy Samaria, ta nankasalanan iray Israelita ed KATAWAN a Dios da ya angyagel ed sikarad ari na Egipto tan angipaway ed sikarad Egipto. Angigalang irad saray arum a diriyos, inalig da ray ogali na saray totoon pinataynan na KATAWAN legan dan mankukurang, tan tinombuk da ray ogalin inggapo na saray arari na Israel.

Angibakiy KATAWAN na saray managpulong tan saray propita to a mamasakbay ed Israel tan Juda. Onyay impaikuantod sikara; “Ikaindan yo ray maoges a kagagawa yo tan onur yo ray bilin kon walad Ganggan ya inter kod saray lalaki yo tan impasabik ed sikayo diad panamegley na saray aripen kon propita.” Balet ag ira tinmoluk; anawet so olo ra, a singa saray lalaki ran ag nanmatalek ed KATAWAN a Dios da. Ag da nilabay ya onuren iray bilin to, ag da sinumpal so impisipanan tod saray lalaki ra, tan ag da inkabkabilangan iray pasakbay to. Inggalang day andi-kakanaan iran talintaoy diriyos tan nagmaliw iran andi-kakanaan met, tan inalig da ray ogali na kaliber-liber iran bansa. Ag da sirin tinoluk so ganggan na KATAWAN ya ag da aligen iray pagano. Mapalalo sirin so pasnuk na KATAWAN ed saray Israelita, kanyan pinataynan to rad arap to tan intilak to labat so nanarian na Juda.

Say Salita’y Katawan.

Ebat a Salmo     Sal. 60:1/2-3/10-11

E/. (5) O KATAWAN, tulongan mo kami pa diad panamegley na pakayarim,

tan ebatan mo kami pa.

Inkaindan mo kami, O Dios, tan tinalo mo kami;

nampasnukan mo kami—balet natan, pawil ka pa lad sikami!

E/. 

Niyegyeg moy dalin, tan pinasangim;

natan tambal mo pa ray sugat to, ta nabubuyak la.

Impanirap mon mapalalo iray totoom;

mandongilngil kamin singa abuek.

E/. 

Peteg ya impolisay mo kami la?

Ag ka la miolup ed saray sondalo mi?

Tulongan mo kami pan mibakal ed saray kalaban mi;

anggapoy kanay tulong na too.

E/. 

Taon I tan II

Alleluia                                                           Cf. Gaw. 16:14

E/. Alleluia. Lokasan mo pay kapusoan mi, O KATAWAN, pian narengel mi ray salita na Anak mo. E/. Alleluia. (Or any in no. 509.)

IBANGHILYO       Mat. 7:1-5

+Babasaen na masanton ibanghilyo onung ed Mateo

Inkuanen Jesus ed saray disipulo to: “Ag yo sisintinsiaay kapara yon too, pian ag ki met sintinsiaay Dios. vTa no panoy panisintinsia yod arum a too, ontan met so panisintinsia na Dios ed sikayo; tan no panoy panusukat yod arum a too, ontan met so panusukat na Dios ed sikayo. Akin et iimanoen moy mokat ed matay agim, balet et ag mo nanaimanoy troson wadtad dilin matam? Panoy pangibagam ed agim, ‘Gala pa ta ekalen koy mokat ed matam,’ no walay troso ed dilin matam? Mansimpisimpitan! Ekal mo nin onona so troson wadtad matam, insan ka makanengneng a maung tan naekal moy mokat ed matay agim.”

Say ibanghilyo’y Katawan.

June 23

martis

ONONAN BABASAEN         2 Ar. 19:9-11, 14-21, 31-35, 36

Babasaen ya inaon ed kumadwan libro na Saray Arari

Nadngelan na impirador na Asiria a diad panangipangulo nen Ari Tirhaca na Etiopia onsasabi ray sondalon ondogpad sikato, kanyan nansulat ed kinen Ari Ezekias na Juda, tan inkuantod sulat to, “Ag ka palilingod imbaga na Dios a panmamatalkan mo ya ag ka napelag ed silong na pakaoley ko. Nadngelan mo lay ginawa na saray impirador na Asiria ed anggan anton bansan ginetma ton deralen. Abaloan mon makapaliis ka?” 

Inawat nen Ari Ezekias so sulat ed lima na saramay imbaki na impirador tan binasa to. Insan linmad dalem na Timplo, inyan tod man imay sulat diad arap na KATAWAN, vtan nampikasi, “O KATAWAN a Dios na Israel, manyodyorung kad mapagalang a tronom diad tagey na saray kirubin, bukbukor moy Dios a manooley ed amin a nanarian diad mundo. Pinalsam so tawen tan dalin. Imanom pa, KATAWAN, so nagagawad sikami. Dengel mo pan amin iray salitan pamapabaing nen Senakerib ed sikan Dios a mabilay. Amta min amin, KATAWAN, a dinederal na saray impirador na Asiria so amayamay a bansa, ginagawa ran andi-kabaliksan iray dalin da, tan pinopoolan da ray diriyos da—ya aliwa ran tuan diriyos, no ag ta talintao ran kiew labat odino bato a ginagawa na limay too. Kanyan natan, KATAWAN a Dios mi, iyagel mo kami pad saray taga Asiria, pian naamtaan na amin da ray bansa ed intiron mundo a bukbukor mo, O KATAWAN, so Dios.”

Insan impaibaga nen Isaias ed kinen Ari Ezekias a dinengel na KATAWAN so pikakasi na ari tan inebatan to. Inkuan na KATAWAN, “Elekan ka na siudad na Jerusalem, Senakerib, tan ludlureyen to ka.

“Wala ray mansiansian mabilay a totood Jerusalem tan diad Palandey na Sion, ta ginetma la na Dios a gawaen to yan andi-saew.

“Onyay inkuan na KATAWAN nipaakar ed impirador na Asiria: ‘Ag to ya looban a siudad odino panaen na anggan sakey. Anggapo ray onsingger ed siudad a sondalon wala ray samper da, tan anggapoy nagawan bontun a para panakep ed siudad. Ompawil ed dinalan to, tan ag to looban yan siudad. Siak a KATAWAN, so nansalita. Iyagel ko yan siudad lapud sikatoy pakagalangan ko tan lapud samay sipan kod kinen David ya aripen ko.’ ’’

Diad saman a labi linmad kampo na saray taga Asiria so sakey ya anghil na KATAWAN tan pinatey toy sanlasus walomplo tan liman libon sondalo. Insan sinmoner si Senakerib ya impirador na Asiria tan pinmawil ed Ninive.

Say Salita’y Katawan.

Ebat a Salmo Sal. 48:1/2-3/9-10

E/. (8) Say Dios aasikasoen ton anggad angga so siudad to.

Matalonggaring so KATAWAN, tan manepenepeg ya idayew

ed siudad na Dios tayo, diad masanton palandey to.

E/. 

Atagey tan marakep so Sion a palandey na Dios; 

say siudad na matalonggaring ya ari 

so mangiiter na gayaga ed intiron mundo.

Impanengneng na Dios ya anggapoy nagawan maoges

ed loob na saray tirinsira na siudad lapud kiwawala tod man.

E/. 

Diad loob na Timplom, O Dios, 

dadalepdepen miy ag mangoman a panangarom.

Idadayew kay amin a katoowan ed inerman a pasen,

tan say inkabantug mo lalaknaban toy intiron mundo.

Matonung so panooley mo!

E/. 

Taon I tan II

Alleluia      2 Cor. 5:19

E/. Alleluia. Say Dios mikakaarod saray katooan diad panamegley nen Cristo; et impia na Dios ed sikami yan balita. E/. Alleluia. (Or any in no. 509.)

IBANGHILYO           Mat. 7:6, 12-14

+Babasaen na masanton ibanghilyo onung ed Mateo

Inkuanen Jesus ed saray disipulo to: “Ag yo iiter ed saray aso so bengatlan masanto, ta poliktaran tan ketketen da kayo. Ag yo met ibabantak ed saray baboy iray alahas yo, ta gatin-gatinan da ra labat.”

“Kanyan gawa yod kapara yon totoo so labay yon gawaen da met ed sikayo. Sikato ya so labay ya ibaga na Ganggan nen Moises; sikato ya met so imbabangat da ray propita.”

“Loob kayod mainget a puirta, ta maawang so puirta tan mainomay so dalan a mamaarap ed impirno, tan sikato yay dadalanen na amayamay a totoo. Balet mainget so puirta tan mairap so dalan a mamaarap ed bilay, tan dagdaiset iray makakalmod sayan dalan.”

Say ibanghilyo’y Katawan.

June 24

Mierkolis

ONONAN BABASAEN   2 Ar. 22:8-13;23:1-3

Babasaen ya inaon ed kumadwan libro na saray Arari

Imbaga nen Safan ed kinen Helcias so ganggan na ari, tan imbaga nen Helcias ed sikato a nalmo tod dalem na Timplo so libro na Ganggan. Inter nen Helcias ed kinen Safan so libro, tan binasa to. Insan pinmawil ed kinen ari tan inkuanto: “Inala na saray aripen mo so kuarta a walad Timplo, insan da inyawat ed saray totoon makaoley ed panapiger na Timplo.” Inkuanto ni, “Niay libron inter ed siak nen Helcias.” Insan maksil ton imbasa imay libro ed ari.

Nen nadngel na ari so impangibasad libro, ginebyas toy kawes to lapud ermen to. Ingganggan to ra di Helcias a pari,  Ahicam a lakin anak nen Safan, Acbor a lakin anak nen Micaya, Safan a sikritario na korti, tan si Asaya a mananulong na ari: “Laka yo, ta ipanonan yo ak ed KATAWAN, tan amin a totood Juda nipaakar ed saray bangat na sayan libro. Mamapasnuk so KATAWAN ed sikatayo, lapud ag ginawa na saray lalaki tayo iray ibabaga na sayan libro.”

Impaawit nen Josias iray amin a pangulo na Juda tan Jerusalem, insan ira nambabansag a linmad Timplo, a kaolup da ray papari tan saray propita, tan amin da ray arum a totoon manaayam ed Jerusalem, mayaman may mairap-bilay. Imbasa na ari diad arap dan amin so intiron libro na sipanan ya arumog ed dalem na Timplo. Nanalagey ed abay na lusek a para ari, insan akisipanan ed KATAWAN ya onuren toy KATAWAN, sumpalen to diad intiron puso tan kamarerwa to iray ganggan tan bilin to, tan gawaen to iray kakaukolan na sipanan onung na nisulat ed samay libro. Insipan met na amin a totoo a sumpalen da so sipanan.

Say Salita’y Katawan.

Ebat a Salmo     Sal. 119:33/34/35/36/37/40

E/. (33) KATAWAN, Ibangat mo pad siak iray pananontonan mo.

KATAWAN, ibangat mo pad siak so kabaliksan da ray ganggan mo,

et lawas ko ran onuren.

E/. 

Itdan mo ak pay pakatalus pian naonur koy ganggan mo;

onuren ko ed intiron pusok.

E/. 

Pansiansia mo ak pan matoluk ed saray ganggan mo,

ta pakalmoan ko ray liket.

E/. 

Itdan mo ak pay pilalek a mangonur ed saray ganggan mo,

aliwan say pilalek ya onyaman.

E/. 

Iyarawim pad siak so pangimanod antokaman ya andi-kakanaan;

ipanengneng mo pad siak so kamaungan mo onung na insipan mo.

E/. 

Labay kon onuren iray ganggan mo;

matonung ka, kanyan pasimbalom pay bilay ko.

E/. 

Taon I tan II

Alleluia           Cf. Ef. 1:17-18

E/. Alleluia. Say Ama na Katawan tayon JesuCristo et lokasan to komun iray mata na kapusoan tayo, pian nanengneng tayo so inkatalonggaring na ilalo ya inkatawagan tayo.  E/. Alleluia. (Or any in no. 509.)

IBANGHILYO                Mat. 7:15-20

+Babasaen na masanton ibanghilyo onung ed Mateo

Inkuanen Jesus ed saray disipulo to: “Manalwar kayod saray tila-tilan propita. Omparontal irad sikayo a singa ra karniro balet, diad tuay tua, singa ra asod katakelan. Nabirbir yo rad panamegley na gawgawa ra. Ta say ubas ag naborbor ed kasabitan, tan say igos ag naborbor ed kiew ya aliwan igos. Say maung a kiew mambunga met na maung;  say makapoy a kiew mambunga met na makapoy. No maung so kiew, ag makapambungay makapoy; no makapoy so kiew, ag makapambungay maung.  Say kiew ya ag mambungay maung, popoen tan poolan. Kanyan sirin, nabirbir yo ray tila-tilan propita diad panamegley na gawgawa ra.”

Say ibanghilyo’y Katawan.

June 25

Huibis

ONONAN BABASAEN  2 Ar. 11:1-4, 9-18, 20

Babasaen ya inaon ed kumadwan libro na Saray Arari

Kadngel nen Atalia ya ina nen Ari Ahazia ed impamatey ed anak to, impapatey ton amin iray kabyangay pamilya na ari. vBukbukor nen Joas a lakin anak nen Ahazia so akabatik. Kaiba la lawari na saray arum a napatey, balet inyagel na panginaen ton si Josaba ya anak nen Ari Jehoram tan agi nen Ahazia ed ama. Inyakar tod kuarton ogipan ed dalem na Timplo si Joas tan say kumokomis ed sikato, ta inyamut tod kinen Atalia, kanyan ag apatey. vKinomisan nen Josaba ya anem taon imay ogaw tan inyaamut tod dalem na Timplo, legan na impanoley nen Atalia a riyna.

Balet nen kumapiton taon, si Joiada a pari impatawag tod Timplo iray opisyal a makaoley ed saray umaantabay na ari tan saray bantay na palasio. Diad dalem na Timplo impansamba to ran onabubon ed gawaen to. Impanengneng tod sikaray Joas a lakin anak nen Ari Ahazia.

Inonur na saramay opisyal ira may ganggan nen Joiada, tan inyakar dad sikato ray totoo ra—saray ag mangguardia no Agew na Panagpainawa tan saray mangguardia. vInter tod saramay opisyal iray pika tan saray samper a kayaryan nen Ari David a nisinup irad dalem na Timplo. Impasen to rad kaliberliber na arap na Timplo, ta iyagel day ari; akaoyus so ispada ray nangguardia. Insan impaway nen Joiada si Joas, kinoronaan to tan inter tod sikato ray ganggan a nipaakar ed panari. Alanaan tan nibawag a manari si Joas. Nantitipak iray totoo tan ineeyag da, “Andokey komun so bilay na ari!”

Nadngel nen Riyna Atalia so ingal da ray guardia tan saray totoo, kanyan nangganat a linmad Timplo a dimay nantitiponan na saray totoo. Anengneng tod man so balon ari a manalalagey ed abay na lusek ed lolooban na Timplo, onung na naogaliyan. Aliber na saray opisyal tan saray managtrumpita so ari, tan malikeliket a maneeyag tan mampapaknul na trumpita iray totoo. Diad inkagunigon to ginebyas toy kawes to tan ineyag to, “Sumlang ya ed pakaoley! Sumlang ya ed pakaoley!”

Ag labay nen Joiada a napatey ed solar na Timplo si Atalia, kanyan ingganggan tod saray opisyal na sondalo: “Ipaway yon idalan ed leet na saray dasig da ray sondalo, tan patey yoy siopaman a mangyagel ed sikato.” Siningkat da, inyakar dad palasio, insan da pinatey ed Puirtay Kabayo.

Si Joiada impisipanan tod Katawan so ari tan saray totoo a sikaray totoo na Katawan; impansipanan to met so ari tan saray totoo. Linmad timplo nen Baal iray totoo, insan da inggeba; minekmek da ray altar tan saray wadman a talintaoy diriyos, tan pinatey dad arap na saray altar si Matan a pari nen Baal.

Wala ray impanbantay nen Joiada ed Timplo. Akaliket ya amin iray totoo, tan dinmeen so siudad, natan ta apatey lad palasio si Atalia.

Say Salita’y Katawan.

Ebat a Salmo   Sal. 132: 11/12/13-14/17-18

E/. (13) Say Katawan pinili toy Sion a panayaman to.

Sinambaan mod kinen David—

sakey a sipan ya ag mo benegan:

“Gawaen kon ari so sakey ed saray anak mon lalaki, 

tan onsalat ed sikan manari.

E/. 

No tooren na saray anak mo so impisipanan ko,

tan onuren da ray ganggan ya ibangat kod sikara,

onsalat met a manari ya anggad angga iray anak da.”

E/. 

Pinili na Katawan so Sion;

labay ton dimay panayaman to:

“Diay panayaman ko ya anggad angga;

diay labay kon panoleyan.

E/. 

Diak gawaen a matalonggaring ya ari so sakey ed saray anak nen David;

diak pagnayonen so oley na pinilik ya ari.

Tabunan ko na kababaingan iray kalaban to,

balet onaligwas so nanarian to.” 

E/. 

Taon I tan II

Alleluia         Jn. 17:17

E/. Alleluia. Say salitam, O Katawan, et katwaan; pasanto mo kami pa diad panamegley na katwaan. E/. Alleluia. (Or any in no. 509.)

IBANGHILYO       Mat. 6:19-23

+Babasaen na masanton ibanghilyo onung ed Mateo

Inkuanen Jesus ed saray disipulo to: “Ag kayo mantitipon na kayamanan diad dalin para sikayon dili, ta nayarin deralen na bokbok tan lati, o natakew ni. Ingen, mantipon kayoy kayamanan diad tawen a para sikayon dili, ta ag diman nayarin deralen na bokbok tan lati tan ag met natakew. Ta no iner so kawalay kayamanan mo, diman met so kawalaay pusom.”

Say mata so pinagkasilew na laman. Kanyan no anggapoy sakit na matam, naliwawaan met so intiron laman mo. Balet no walay sakit na matam, nabilongetan met so intiron laman mo. Kanyan no say liwawan walad sika et bilonget manaya, agaylay bilonget!”

Say ibanghilyo’y Katawan.

June 26

biyernes

Taon II

ONONAN BABASAEN  2 Ar. 11:1-4, 9-18, 20

Babasaen ya inaon ed kumadwan libro na Saray Arari

Kadngel nen Atalia ya ina nen Ari Ahazia ed impamatey ed anak to, impapatey ton amin iray kabyangay pamilya na ari. vBukbukor nen Joas a lakin anak nen Ahazia so akabatik. Kaiba la lawari na saray arum a napatey, balet inyagel na panginaen ton si Josaba ya anak nen Ari Jehoram tan agi nen Ahazia ed ama. Inyakar tod kuarton ogipan ed dalem na Timplo si Joas tan say kumokomis ed sikato, ta inyamut tod kinen Atalia, kanyan ag apatey. vKinomisan nen Josaba ya anem taon imay ogaw tan inyaamut tod dalem na Timplo, legan na impanoley nen Atalia a riyna.

Balet nen kumapiton taon, si Joiada a pari impatawag tod Timplo iray opisyal a makaoley ed saray umaantabay na ari tan saray bantay na palasio. Diad dalem na Timplo impansamba to ran onabubon ed gawaen to. Impanengneng tod sikaray Joas a lakin anak nen Ari Ahazia.

Inonur na saramay opisyal ira may ganggan nen Joiada, tan inyakar dad sikato ray totoo ra—saray ag mangguardia no Agew na Panagpainawa tan saray mangguardia. vInter tod saramay opisyal iray pika tan saray samper a kayaryan nen Ari David a nisinup irad dalem na Timplo. Impasen to rad kaliberliber na arap na Timplo, ta iyagel day ari; akaoyus so ispada ray nangguardia. Insan impaway nen Joiada si Joas, kinoronaan to tan inter tod sikato ray ganggan a nipaakar ed panari. Alanaan tan nibawag a manari si Joas. Nantitipak iray totoo tan ineeyag da, “Andokey komun so bilay na ari!”

Nadngel nen Riyna Atalia so ingal da ray guardia tan saray totoo, kanyan nangganat a linmad Timplo a dimay nantitiponan na saray totoo. Anengneng tod man so balon ari a manalalagey ed abay na lusek ed lolooban na Timplo, onung na naogaliyan. Aliber na saray opisyal tan saray managtrumpita so ari, tan malikeliket a maneeyag tan mampapaknul na trumpita iray totoo. Diad inkagunigon to ginebyas toy kawes to tan ineyag to, “Sumlang ya ed pakaoley! Sumlang ya ed pakaoley!”

Ag labay nen Joiada a napatey ed solar na Timplo si Atalia, kanyan ingganggan tod saray opisyal na sondalo: “Ipaway yon idalan ed leet na saray dasig da ray sondalo, tan patey yoy siopaman a mangyagel ed sikato.” Siningkat da, inyakar dad palasio, insan da pinatey ed Puirtay Kabayo.

Si Joiada impisipanan tod Katawan so ari tan saray totoo a sikaray totoo na Katawan; impansipanan to met so ari tan saray totoo. Linmad timplo nen Baal iray totoo, insan da inggeba; minekmek da ray altar tan saray wadman a talintaoy diriyos, tan pinatey dad arap na saray altar si Matan a pari nen Baal.

Wala ray impanbantay nen Joiada ed Timplo. Akaliket ya amin iray totoo, tan dinmeen so siudad, natan ta apatey lad palasio si Atalia.

Say Salita’y Katawan.

Ebat a Salmo   Sal. 132: 11/12/13-14/17-18

E/. (13) Say Katawan pinili toy Sion a panayaman to.

Sinambaan mod kinen David—

sakey a sipan ya ag mo benegan:

“Gawaen kon ari so sakey ed saray anak mon lalaki, 

tan onsalat ed sikan manari.

E/. 

No tooren na saray anak mo so impisipanan ko,

tan onuren da ray ganggan ya ibangat kod sikara,

onsalat met a manari ya anggad angga iray anak da.”

E/. 

Pinili na Katawan so Sion;

labay ton dimay panayaman to:

“Diay panayaman ko ya anggad angga;

diay labay kon panoleyan.

E/. 

Diak gawaen a matalonggaring ya ari so sakey ed saray anak nen David;

diak pagnayonen so oley na pinilik ya ari.

Tabunan ko na kababaingan iray kalaban to,

balet onaligwas so nanarian to.” 

E/. 

Taon I tan II

Alleluia         Jn. 17:17

E/. Alleluia. Say salitam, O Katawan, et katwaan; pasanto mo kami pa diad panamegley na katwaan. E/. Alleluia. (Or any in no. 509.)

IBANGHILYO       Mat. 6:19-23

+Babasaen na masanton ibanghilyo onung ed Mateo

Inkuanen Jesus ed saray disipulo to: “Ag kayo mantitipon na kayamanan diad dalin para sikayon dili, ta nayarin deralen na bokbok tan lati, o natakew ni. Ingen, mantipon kayoy kayamanan diad tawen a para sikayon dili, ta ag diman nayarin deralen na bokbok tan lati tan ag met natakew. Ta no iner so kawalay kayamanan mo, diman met so kawalaay pusom.”

Say mata so pinagkasilew na laman. Kanyan no anggapoy sakit na matam, naliwawaan met so intiron laman mo. Balet no walay sakit na matam, nabilongetan met so intiron laman mo. Kanyan no say liwawan walad sika et bilonget manaya, agaylay bilonget!”

Say ibanghilyo’y Katawan.

June 27

sabado

ONONAN BABASAEN 2 Ar. 24: 8-17

Babasaen ya inaon ed kumadwan libro na Saray Arari

Labinwaloy taon nen Joakin nen nagmaliw ya ari na Juda, tan nanoley ed Jerusalem na taloy bulan. Si Nehusta a taga Jerusalem so ina to. Nanggagawa na kaogsan ed arap na KATAWAN si Joakin, a singa ginagawa nen ama to.

Legan na panooley to nilakob na saray sondalon taga Babilonia so Jerusalem, diad panangipangulo na saray opisyal nen Ari Nabucodonosor. Legan na impanlakob na saray sondalo, linmad Jerusalem si Nabucodonosor, insan sinmukod saray taga Babilonia si Ari Joakin, si ina to, saray anak ton lalaki, saray opisyal to, tan saray opisyal na palasio. Nen kumawalon taon na panooley nen Nabucodonosor, inawit ton priso si Joakin tan inala to met ya amin iray kayamanan na Timplo tan palasio. Onung na impasakbay la na KATAWAN, binebetag ya amin nen Nabucodonosor iray ginagawa nen Ari Solomon a balituk a kagawaan ed dalem na Timplo. Inawit ton priso iray totoo ed Jerusalem, amin da ray opisyal na ari, tan amin a manonan totoo; samplon libo ran amin. Intaruk to met ya amin iray maung a kumikimey, pati saray pumapanday; intilak to labat ed Juda iray totoon sankamairapan ed bilay.

Inawit nen Nabucodonosor si Joakin a priso ed Babilonia, pati say ina nen Joakin, saray asawa to, saray opisyal to, tan saray manonan totoo ed Juda. Inyakar nen Nabucodonosor ed Babilonia iray amin a totoon atagey so kipapasen, piton libo ran amin, tan sanlibo ray marunong a kumikimey, pati saray pumapanday, a maung iran amin ya impanlaman tan sarag day mansondalo.

Si Nabucodonosor insalat ton ari na Juda si Natanias a pangamaen nen Joakin, insan to sinalatan so ngaran to na Sedekias.

Say Salita’y Katawan.

Ebat a Salmo     Sal. 79: 1-2/3-5/8/9

E/. (9) Iyagel mo kami pa, O Katawan, lapud kagalangay ngaran mo.

O Dios, say dalin mo et nilooban na saray pagano.

Dinotakan day inkasanto na Timplom

tan dineral-deral day Jerusalem.

Impabwag dad saray manok a buitri iray bangkay na saray aripen mo,

diad saray ayayep ed katakelan iray bangkay na saray totoom.

E/. 

Inibung dan singa danum so dala da ray totoom;

say dala ra inmagos ed intiron Jerusalem,

et anggapoy akeraan a mangipompod saray bangkay.

E./

Luludlureyen da kami ray kakaabay min bansa;

elek-elekan tan balbalawen da kami.

Katawan, ag la mangangga so pasnuk mod sikami?

Mansiansian mandarlang a singa apoy so pasnuk mo?

E/. 

Ag mo kami pa dudusaen lapud saray kasalanan da ray lalaki mi.

Kasian mo kami pa natan;

naandi lan amiy ilalo mi.

E/. 

Tulongan mo kami pa, O Dios, tan ilaban mo kami pa;

iyagel mo kami pa tan pirdonam pa ray kasalanan mi,

lapud kagalangay ngaran mo.

E/. 

Taon I tan II

Alleluia     Fil. 2:15-16

E/. Alleluia. Nepeg a liwawaan yo ra a singa panliwaway bitewen ed tawen, legan yon ipupulong ed sikaray salitan mangiiter na bilay.

E/. Alleluia. (Or any in no. 599.)

IBANGHILYO       Mat. 7:21-29

+Babasaen na masanton ibanghilyo onung ed Mateo

Inkuanen Jesus ed saray disipulo to: “Aliwan amin da ray ontawag ed siak na ‘Katawan, Katawan,’ so makaloob ed Panariay tawen, no ag labat saray manumpal ed linaway Amak a walad tawen. No onsabiy Agew na Okum, dakerakel iray mangibagad siak na: ‘Katawan, Katawan! Diad ngaran mo nampupulong kami, pinapaekal mi ray dimonyo tan nanggagawa kami ray milagro!’ Balet ikuankod sikara, ‘Ag ta kayon balut kabat. Arawi kayod siak, sikayon managgaway kaogsan!’ “

“Kanyan siopamay ondengel tan manumpal ed sarayan salitak, aliling toy sakey a toon makalakal ya angipaalagey ed bato na abung to. Sinmabiy maples ya oran, dinmelap, tan katekep to niy maksil a bagyon binmasig ed saman ya abung. Ag balet nagba, ta bato so pundasion to.

“Siopamay ondengel ed sarayan salitak et ag to ra lamlamang sumpalen, aliling toy sakey a toon anggapoy kalakal ya angipaalagey ed buer na abung to. Sinmabiy maples ya oran, dinmelap, tan katekep to niy maksil a bagyon binmasig ed saman ya abung. Nagba yan abung, tan makapataktakot so inkagba to!”

Kasumpal to ra yan imbaga nen Jesus mankelaw iray totood impambangat to, ta imbangat to ran walay pakayari, aliwan singa panagbangat da ray iskriba. 

Say ibanghilyo’y Katawan.